Հ. Հովնանյան ընտանեկան հիմնադրամն ավելի քան 400 000 դոլար է հատկացրել հանրային կրության ուժեղացմանը և շրջակա միջավայրի զարգացմանն ուղղված երրորդ եռամսյակի դրամաշնորհերի բաց կանչ հայտարարել

Մամլո հաղորդագրություններ

29 July 2025

Հուլիս 29, Երևան, Հայաստան – Հ․Հովնանյան ընտանեկան հիմնադրամն ավելի քան 400,000 ԱՄՆ դոլարի դրամաշնորհ է տրամադրել վեց նախաձեռնությունների՝ ուղղված հանրակրթության որակի բարելավմանն ու մատչելիությանը Հայաստանի մարզերում:

Նախագծերը, որոնք ընտրվել են Հիմնադրամի 2025 թ. առաջին եռամսյակի դրամաշնորհային փուլի ավելի քան 110 հայտերից, արտահայտում են հավասարության, նորարարության և ներառականության վրա հիմնված կրթական բարեփոխումների հանդեպ ձգտումը։ Գիտության լաբորատորիաների արդիականացումից մինչև ուսումնական կրեդիտների նոր մոդելի ներդրում. ֆինանսավորված ծրագրերը ներկայացնում են տեղական նորարարական լուծումներ և համագործակցություն համազգային մակարդակում:

Դրամաշնորհեր ստացած մի քանի նախաձեռնություններ գործունեություն են ծավալում անմիջապես Հայաստանի մարզերում՝ կրճատելով Երևանի և մյուս համայնքների ռեսուրսների և հնարավորությունների միջև բացը:

Իջևանում գործող Տավուշի Պատրիկ Դևեջյանի անվան տարածաշրջանային քոլեջը դրամաշնորհը կուղղի ֆիզիկայի, քիմիայի և կենսաբանության լաբորատորիաների վերանորոգմանն ու տեխնիկական սարքավորումների ձեռքբերմանը։ Քոլեջը կթարմացնի ինժեներական ցանցերը, կկահավորի լաբորատորիաները, կտեղադրի համակարգիչներ և մուլտիմեդիա սարքեր՝ ապահովելով ուսանողների գործնական ուսուցումը։ Լաբորատորիաները հիմնական ծրագրի շրջանակներում կծառայեն բոլոր ուսանողներին, իսկ ուսանողների առնվազն 30 տոկոսը կընդգրկվի հատուկ մասնագիտական ծրագրերում։ Նախագիծը ենթադրում է նաև երկարաժամկետ կայունություն. քոլեջը պարտավորվում է յուրաքանչյուր տարի ապահովել տեխնիկական սպասարկման ծախսերը։

Թվային կրթությունը ևս այս տարվա դրամաշնորհերի թիրախում է։ Վիզուալ Հայաստան զարգացման հիմնադրամն իր Աշխարհացույց ծրագրի շրջանակներում 20 նոր հանրակրթական դպրոցի կտրամադրի սմարթ-էկրաններ և կվերապատրաստի 250 ուսուցչի՝ դրանք դասապրոցեսում արդյունավետ կիրառելու նպատակով: Նախագիծը նպատակ ունի ոչ միայն տեխնիկապես հագեցնել դպրոցները, այլև ինտեգրել տեխնոլոգիաները կրթական գործընթացում մրցակցային մոդելի միջոցով։

Շախմատի կրթության մեջ առանցքային դեր ունեցող Հայաստանի շախմատի ակադեմիան դրամաշնորհը կուղղի շախմատի 500 ուսուցչի վերապատրաստմանը և հանրակրթական դպրոցներում շախմատի 6000 հավաքածուի տրամադրմանը։ Նախաձեռնությունն ապահովելու է նյութական աջակցությունը և բարձրորակ ուսուցումը, ինչը թույլ կտա պահպանել Հայաստանի՝ շախմատի կրթության առաջատար դիրքը:

Հայաստանի հարավային մարզում՝ Սյունիքում, Հայաստանի մանուկներ հիմնադրամը (ՔՈԱՖ) կաշխատի Գորիս և Սիսիան համայնքների անգլերենի 14 ուսուցչի հետ։ Նախագիծը ներառում է մենթորության բաղադրիչ, մասնագիտական զարգացման դասընթացներ և ուսումնական նյութերի տրամադրում։ Ուսուցիչները կստանան լեզվական խորացված ուսուցում և մեթոդաբանական աջակցություն՝ մշակված Հայաստանի ամերիկյան համալսարանի (ՀԱՀ) հետ համագործակցությամբ։

Հայաստանի գիտության և տեխնոլոգիաների հիմնադրամը (ՖԱՍԹ) ՀՀ կրթության, գիտության, մշակույթի և սպորտի նախարարության հետ համատեղ իրականացնում է պիլոտային նախագիծ՝ նպատակ ունենալով հանրային 24 դպրոցում փորձարկել կրեդիտային ակադեմիական համակարգը՝ որպես կրթական բարեփոխման առաջին քայլ։ Դրամաշնորհը կաջակցի վերլուծական ուսումնասիրությանը, շահագրգռված կողմերի հետ խորհրդատվություններին և իրականացման ռազմավարության մշակմանը։ Երկարաժամկետ նպատակը ճկունության ներդրումն է, որն ուսանողներին թույլ կտա վաստակել և կրեդիտներ փոխանցել ծրագրերի միջև։

Այբ կրթական հիմնադրամը կիրականացնի լիդերության զարգացման մեկամյա ծրագիր՝ նախատեսված հանրակրթական դպրոցների գործող և ապագա 60 տնօրենի համար։ Ծրագիրը ներառում է առաջնորդություն, ռազմավարական պլանավորում, նախագծային ուսուցում և թվային գրագիտություն և նպատակ ունի ապահովել կրթական հաստատությունների տնօրենների՝ ղեկավարած հաստատությունների արդյունավետ կառավարումը:

«Այս վեց նախագծերն արտացոլում են Հիմնադրամի՝ կրթության երկարաժամկետ և ներառական զարգացման տեսլականը: Մեզ համար կարևոր էր աջակցել ոչ միայն հանրապետական մասշտաբի դերակատարներին, այլև մարզային հաստատություններին և ապագային միտված և մեծ ներուժով նախաձեռնություններին», – ասում է Հ. Հովնանյան ընտանեկան հիմնադրամի ծրագրերի ղեկավար Անահիտ Հակոբյանը։

Դրամաշնորհային նոր փուլ. շրջակա միջավայր

Հիմնադրամը մեկնարկել է 2025թ.երրորդ եռամսյակի դրամաշնորհերի փուլը՝ այս անգամ կարևորելով շրջակա միջավայրի դիմակայունությունն ու զարգացումը։ 2026 թվականին Հայաստանը հյուրընկալելու է ՄԱԿ-ի Կենսաբազմազանության COP17 համաժողովը Երևանում, և այս փուլը կարևոր հնարավորություն է՝ աջակցելու տեղական նախաձեռնություններին, որոնք համապատասխանում են պահպանման և էկոլոգիական դիմակայունության գլոբալ օրակարգին։

Ֆինանսավորման ընդհանուր ֆոնդը կազմում է 320 000, իսկ յուրաքանչյուր դրամաշնորհի միջին չափը՝ 30 000-35 000 դոլար։ Նախագծերը պետք է լուծեն հետևյալ առաջնահերթություններից առնվազն մեկը. էկոլոգիական ռիսկերի հանդեպ դիմակայունության աճ, ռեսուրսների կայուն օգտագործում կամ էկոլոգիական իրազեկության և նորարարության աճ։ Մանրամասն տեղեկությունները հասանելի են դրամաշնորհի մեկնարկի հայտարարությունում։

Այս դրամաշնորհը ներկայացնում է դիմումի նոր եռափուլ գործընթաց.

Համապատասխանության ստուգում. դիմորդները պետք է անցնեն կայքում ներկայացված համապատասխանության կարճ հարցումը:
Նախագծի հայեցակարգի ներկայացում. համապատասխանող դիմորդներին առաջարկվում է հակիրճ ներկայացնել նախագծի կոնցեպտը:
Ամբողջական հայտ. միայն 25 դիմորդ-կազմակերպություն կընտրվի լիարժեք հայտ ներկայացնելու համար: Վերջնաժամկետը՝ սեպտեմբերի 30, 2025 թ.

Հիմնադրամը կդադարեցնի հայտերի ընդունումը, երբ կլրանա ամբողջական դիմումների նապատեսված թիվը: Խորհուրդ է տրվում ներկայացնել վաղ փուլում, քանի որ ուշ ներկայացված ուժեղ նախագծերը հնարավոր է չհասցնեն անցնել հաջորդ փուլ:

«Մենք ներդրեցինք փուլային այս մոտեցումը, որպեսզի խթանենք ավելի ուժեղ առաջարկներն ու նվազեցնենք դիմողների ծանրաբեռնվածությունը: Հորդորում ենք դիմել հնարավորինս շուտ՝ հետադարձ կապի և շտկումների հնարավորությունն ապահովելու նպատակով», – նշել է Անահիտ Հակոբյանը։

Ամբողջական ուղեցույցները, համապատասխանության չափորոշիչները և դիմումի նյութերը հասանելի են Հ. Հովնանյան ընտանեկան հիմնադրամի կայքում:

***

1986 թվականին ստեղծվելուց ի վեր, Հ․ Հովնանյանի ընտանեկան հիմնադրամը հատկացրել է ավելի քան 100 միլիոն դոլար՝ հարյուրավոր բարեգործական, կրթական, գիտական, մշակութային և այլ ուղղվածությունների նախագծերի իրականացման համար՝ առաջնահերթ աջակցություն տրամադրելով աշխարհի հայ համայնքներին, ինչպես նաև Նյու Ջերսի նահանգի Մոնմութ և Օուշեն շրջաններում գործող կազմակերպություններին։